India Meteorological Department (IMD) મુજબ મહારાષ્ટ્રના અનેક વિસ્તારોમાં આજે અને આવતીકાલે ભારે વરસાદની સંભાવના છે. કેટલાક વિસ્તારોમાં કરા પડવાની શક્યતા પણ વ્યક્ત કરવામાં આવી છે, જ્યારે પૂર્વ વિદર્ભ, દક્ષિણ મરાઠવાડા અને દક્ષિણ મધ્ય મહારાષ્ટ્રમાં વધુ વરસાદની આગાહી કરવામાં આવી છે. કેટલાક જિલ્લાઓમાં ઓરેન્જ એલર્ટ જાહેર કરવામાં આવ્યું છે.
આજે કોલ્હાપુર, સાતારા, સાંગલી, સોલાપુર, બીડ, ધારાશિવ, લાતુર, નાંદેડ, પરભણી, હિંગોલી, યવતમાલ, વર્ધા, ચંદ્રપુર અને ગઢચિરોલી જિલ્લામાં કેટલાક સ્થળોએ વીજળીના કડાકા-ભડાકા સાથે કરા પડવાની શક્યતા છે.
હવામાન વિભાગના અંદાજ મુજબ, આ સમયગાળા દરમિયાન 50થી 60 કિમી પ્રતિ કલાકની ઝડપે તોફાની પવન ફૂંકાઈ શકે છે. ઉપરાંત સિંધુદુર્ગ, રત્નાગીરી, રાયગઢ, પુણે, અહિલ્યાનગર, છત્રપતિ સંભાજીનગર, જાલના, વાશિમ, અમરાવતી, નાગપુર, ભંડારા અને ગોંદિયા જિલ્લામાં પણ વીજળી સાથે વરસાદની શક્યતા છે.
આવતીકાલે પણ રાજ્યમાં સમાન પરિસ્થિતિ યથાવત રહેવાની ધારણા છે. અહિલ્યાનગર, બીડ, જાલના, પરભણી, છત્રપતિ સંભાજીનગર, નાસિક અને જલગાંવ જિલ્લામાં ગાજવીજ સાથે કરા પડવાની સંભાવના છે. આ દરમિયાન તેજ પવન પણ ફૂંકાશે. વિદર્ભ, મરાઠવાડા અને મધ્ય મહારાષ્ટ્રના અન્ય વિસ્તારોમાં હળવા વરસાદની શક્યતા છે.
હવામાન વિભાગ મુજબ શુક્રવારથી વરસાદની તીવ્રતા ઘટશે. દક્ષિણ મરાઠવાડા અને પૂર્વ વિદર્ભમાં હળવો વરસાદ રહી શકે છે, જ્યારે શનિવારથી રાજ્યમાં વરસાદી માહોલ ઓસરી જશે અને તાપમાનમાં ફરી વધારો થવાની શક્યતા છે.
